Artikel Sunda
Ngabuburit
Ngabuburit,
kecap anu moal bisa dipopohokeun ku jalma anu dirina ngaku urang Sunda, boh
pituin, atawa blasteran, ogé Sunda Kukut. Keun teu kudu dibéjér béaskeun
ngeunaan subjékna mah, naon Sunda pituin, blasteran, atawa Kukut. Bisi jauh
teuing, ka mana meni. Anu jelas, ngabuburit kecap tina basa Sunda tapi
dipimilik ku urang Indonesia, teu hésé ngucapkeunna, urang Jawa, Bali, Lombok,
Acéh, Melayu, Papua, bisa ngucapkeun kecap ngabuburit kalawan faséhat. Teu siga
kalimah batok kohok wadah huut, Mas Parno nepi ka bijil késang
badag késang lembut waktu dititah ngucapkeun éta kalimah, hésé meureun da teu
biasa, sarua jeung urang anu jarang maca Qur’an terus dititah ngimaman sholat
berjama’ah.
Lain
gampang diucapkeunna wungkul, ogé dipikaresep ku sasaha, komo ku urang anu keur
ngalakonan ibadah puasa. Lain dipikaresep ku jalma biasa wungkul. Para
pangusaha jegud ogé raresepeun, iklan-iklan roko teu kagok masang huruf badag
kecap ngabuburit dina baligo-baligo, bari teu kudu bébéja heula ka urang Sunda,
da meureun kabéh ogé pada apal lamun basa mah teu kakeunaan ku aturan royalty,
saha baé bisa ngagunakeunna. Politikus ogé resepeun kana kecap ngabuburit, keur
ngudag dukungan, keur ngiceupan massa mengambang, maranéhna ngawur-ngawur jangji
bari teu kireum-kireum ngucapkeun kecap ngabuburit. Geus puguh ari TV mah, basa
anu teu boga hak royalty téh ku maranéhna mah bisa dijadikeun komoditas, bisa
jadi piduiteun, bisa nyokot kauntungan ku ngajadikeun kecap ngabuburit
jadi acara-acara dina TV.
Burit
nunjukeun hiji wanci. Téréh magrib, kahirupan téréh bérés. Sanggeus sapoé jeput
jalma diuudag ku pangabutuh, capé meureun, wanci tunggang gunung mangrupa
mangsa keur nyinglarkeun sagala pangbeubeurat anu minuhan kahirupan jalma.
Burit, hiji totondén, jandéla beurang baris ditutup, papayon sandéwara
kahirupan anu dilakonan baris dipungkas. Dina wanci ieu pisan, jalma bisa
ngarénghap panjang, bari peureum sakeudeung. Ngan geus puguh, urang bakal
nyanghareupan poék, peuting bakal manting. Anu bagja hirupna, lamun salila
beurang tadi manéhna bisa ngeusi kahirupan ku hal-hal anu bakal mawa kaluginaan
salila reureuh. Dina reureuhna baris bisa meureumkeun panon kalawan teu
diudag-udag ku karingrang, sok sanajan ngagolér saukur dina luhureun samak
butut, atawa dipan teuas.
Jandéla
kahirupan geus baris ditutup. Kariaan jadi tanda, lamun wanci geus deukeut ka
bukti. Hiji bukti anu geus pasti: “ Iqtarobatissa’aah….” Geus
deukeut waktu anu geus ditangtukeun. Klimaks kahirupan ngaramékeun wanci
tunggang gunung, jalma-jalma ngabuburit bari ngalalajoan pintonan éta
sandéwara, sawaréhna bener-bener jadi aktor anu ngalakonan sandéwara. “
Saya’ti ‘Ala Ummaatii Zamaanun..” zaman anu ku Rasul didawuhkeun bakal
datang téh meureun ayeuna pisan. Ramé ti ditu- ti dieu, aya anu marawa
goong lain ditakol, tapi disusuhun, aya anu tarumpak kuda ngan hulu kuda
kahareup anu tumpakna nukangan. Tapi teu sautik, jalma anu wajar-wajar baé dina
polah. Laleumpang maraké suku, ngabandaleut sisi jalan, teu némbongkeun
karingrang, teu lémék teu nyarék, lumampah mapay jalan balik.
Tinggal,
urang anu nangtukeun léngkah, sanggeus wanci tunggang gunung réngsé, sanggeus
burit geus diganti ku wanci sareupna, urang rék leumpang jeung lumampah
ka mana?
Sumber
: http://sosbud.kompasiana.com/2011/08/17/artikel-sunda-ngabuburit/
Tidak ada komentar:
Posting Komentar